जलवायु प्रतिबद्धता तत्काल कार्यान्वयन गर्न राष्ट्रसंघको आग्रह
- २९ कार्तिक २०८३
- १ मिनेटको पढाई
न्युयोर्क- टर्कीको अन्ताल्यामा चलिरहेको कोप-३१ सम्मेलनमा संयुक्त राष्ट्रसंघले जलवायु परिवर्तनविरुद्धका प्रतिबद्धतालाई छिटो व्यवहारमा उतार्न आग्रह गरेको छ। राष्ट्रसंघीय जलवायु परिवर्तनसम्बन्धी कार्यकारी सचिव साइमन स्टिलले बाँकी समयको सदुपयोग गर्दै तत्काल सहमतिमा पुग्न वार्ताकारहरूलाई आह्वान गरेका हुन्।
स्टिलले कठिन विषयहरूमा रणनीतिक ढिलाइ नगरी छिटो छलफल अघि बढाउन भनेका छन्। उनले सबै देशले लचकता अपनाएर आपसी समझदारी गर्नुपर्ने बताए। स्वच्छ ऊर्जा, हरित उद्योग र विपद् जोखिम न्यूनीकरण जस्ता क्षेत्रमा अब ठोस काम गर्नुपर्नेमा उनको जोड छ।
जलवायु अभियानलाई सरकारी नीति र अन्तर्राष्ट्रिय सम्झौतामा मात्र सीमित नराखी आम मानिसको दैनिक जीवनसँग जोड्नुपर्ने स्टिलले बताए। उनले यसलाई स्वास्थ्य सेवा, रोजगारी र सस्तो ऊर्जा जस्ता नागरिकका प्रत्यक्ष आवश्यकतासँग जोड्नुपर्ने उल्लेख गरे।
गत सोमबारदेखि सुरु भएको कोप-३१ सम्मेलन नोभेम्बर २० सम्म चल्नेछ। यो सम्मेलनले विशेषगरी विकासशील देशका लागि जलवायु वित्त बढाउने, अनुकूलनका कार्यक्रम ल्याउने र स्वच्छ ऊर्जाको विकासलाई प्राथमिकतामा राखेको छ।