भर्जिनियामा यौन अपराधीले वृद्धाश्रममा प्रवेश गरी ८५ वर्षीया महिलामाथि बलात्कार गरेको आरोप

न्युयोर्क- अमेरिकाको भर्जिनियास्थित एक स्वतन्त्र आवास केन्द्रमा एक वृद्ध महिला बलात्कारको शिकार बनेकी छन्। प्रहरीले घटनामा संलग्न ३२ वर्षीय यौन अपराधीलाई पक्राउ गरेको जनाएको छ।

घटना शुक्रबार बिहान म्यानासस शहरको *द फेयरमोन्ट बाई बार्कले हाउस* नामक वृद्धाश्रममा भएको हो। प्रहरीका अनुसार त्यहाँ कार्यरत नर्सहरूले ८५ वर्षीया महिलाको कराएको आवाज सुनेपछि कोठामा पुग्दा ती महिला बलात्कारको शिकार भइरहेकी थिइन्।

प्रिन्स विलियम काउन्टी प्रहरीका प्रवक्ता रेने कारका अनुसार, “आरोपित व्यक्ति सुरक्षा नभएको पछाडिको ढोका हुँदै प्रवेश गरेका थिए र त्यहाँ बसोबास गरिरहेकी एक महिला बासिन्दामाथि यौन हिंसा गरेका थिए।”

कर्मचारीहरूले ती व्यक्तिलाई नियन्त्रणमा लिएका थिए, र प्रहरी घटनास्थलमा पुगेर उनलाई पक्राउ गरेको थियो। पक्राउ परेका बेंजामिन दिनार्टे (Benjamin Dinarte)माथि चारवटा गम्भीर आपराधिक अभियोग लगाइएको छ।

पक्राउ परेका दिनार्टे पूर्व यौन अपराधी हुन्। भर्जिनिया स्टेट प्रहरीको तथ्यांकअनुसार, उनी यौन दुर्व्यवहारको मुद्दामा पटक–पटक दोषी ठहर भइसकेका छन्। सन् २०१८ मा एक स्टोरमा कार्यरत कर्मचारीको पिठ्युँमा टोक्दै यौन दुर्व्यवहार गरेको अभियोगमा उनलाई सजाय सुनाइएको थियो।

त्यसअघि २०१७ मा, जब उनका बच्चालाई एक महिलाले हेरेकी थिइन् र दिनार्टे अस्पतालमा सुत्केरी श्रीमती भेट्न गएका थिए, त्यही अवसरमा ती महिलामाथि यौन आक्रमण गरेका थिए भन्ने उजुरी प्रहरीसँग दर्ता छ।

हाल दिनार्टे बिना धरौटी जेलमा छन् र आगामी जुलाईमा अदालतमा उपस्थित गराइनेछ।

वृद्धाश्रमकी महाप्रबन्धक क्यामिल साईले एक विज्ञप्ति जारी गर्दै भनिन्, “हाम्रो समुदायका एक सदस्यमाथि यस्तो घिनलाग्दो अपराध भएको सुन्दा हामी स्तब्ध र दुःखी छौँ। पीडित र उनको परिवारप्रति हामी पूर्ण समर्थन जनाउँछौँ र निजको गोपनीयता कायम राख्न सबैसँग आग्रह गर्छौँ। घटनापछि हाम्रा कर्मचारीहरूले देखाएको साहस र प्रहरीको छिटो कारबाहीका लागि हामी आभारी छौँ। अनुसन्धानमा हामी पूर्ण रूपमा सहकार्य गरिरहेका छौँ।”

प्रहरीले घटनाको अनुसन्धान जारी राखेको जनाएको छ। यस घटनाले स्वतन्त्र आवास केन्द्रमा सुरक्षा व्यवस्था र यौन अपराधीहरूको निगरानीप्रति गम्भीर प्रश्न उठाएको छ।