अवैध आप्रवासीद्वारा अमेरिकी अधिकारीमाथि गोली प्रहार, पहिलो दर्जाको हत्या प्रयासमा १८ वर्ष कैद
टेनेसी — एउटा सामान्य ट्राफिक जाँच घातक झडपमा परिणत भयो जब एक अवैध आप्रवासीले टेनेसी हाइवे गस्ती अधिकारीमाथि गोली प्रहार गरे। ग्वाटेमालाबाट गैरकानुनी रूपमा अमेरिका प्रवेश गरेका एउजेनियो अब्राहाम सोलिस-क्लार्क्स (३१) लाई पहिलो दर्जाको हत्या प्रयास आरोपमा दोषी ठहर गर्दै १८ वर्षको जेल सजाय सुनाइएको छ।
टेनेसीको नक्स काउन्टी जिल्ला महान्यायाधिवक्ताको कार्यालयले बिहीबार सोलिस-क्लार्क्सको सजायको घोषणा गरेको हो। उनलाई परोल (जमानत वा छुट) नपाउने गरी जेल सजाय दिइएको हो।
घटना यस वर्ष जनवरी १२ मा सुरू भएको थियो, जब टेनेसी हाइवे गस्तीका ट्रुपर मोर्गन स्नाइडर ले लाउडन काउन्टीको इन्टरस्टेट ७५ मा ९७ माइल प्रतिघण्टा गतिमा गाडी चलाइरहेको देखेर सोलिस-क्लार्क्सलाई रोक्दा सुरु भएको थियो।
स्नाइडरले उनलाई रोक्नासाथ परिचय पत्र सोधेपछि सोलिस-क्लार्क्सले ग्वाटेमालाको कन्सुलर ID प्रस्तुत गरेका थिए। त्यसपछि थप सुरक्षाको लागि थप दुई ट्रुपर — पल डुब्रोक र जस्टिस हासे — घटनास्थलमा पुगे।
अधिकारीहरूले ट्राफिक सिटेसन जारी गर्ने क्रममा सोलिस-क्लार्क्सले अचानक उच्च गतिमा भाग्न थाले र १०० माइल प्रतिघण्टाभन्दा बढी गतिमा गाडी चलाउँदै नक्स काउन्टीतर्फ पसे।
गाडी नियन्त्रणमा नआएपछि ट्रुपर डुब्रोकले उनलाई पछ्याउँदै अगाडि रोक्ने प्रयास गरे। त्यसक्रममा सोलिस-क्लार्क्सले आफ्नो गाडीबाट आक्रमण हतियार निकालेर ट्रुपर डुब्रोकतर्फ ताके र दुवैबीच गोली हानाहान भयो।
पछि सोलिस-क्लार्क्स भाग्दै इण्टरस्टेटको इन्ट्रान्स र्याम्पतर्फ जाँदै गर्दा ट्रुपर डुब्रोकले उनलाई खुट्टामा गोली हानेर नियन्त्रणमा लिएका थिए। उनलाई तुरुन्तै प्राथमिक उपचार दिइएको थियो भने कुनै पनि अधिकारी घाइते भएका थिएनन्।
नक्स काउन्टीकी जिल्ला महान्यायाधिवक्ता चार्म एलेन ले भनिन्, “टेनेसी हाइवे गस्ती र अनुसन्धान ब्यूरोको पेशागत कामको कारण यस अभियुक्तलाई न्यायको कठघरामा उभ्याउन सकियो।”
सोलिस-क्लार्क्स गैरकानुनी रूपमा अमेरिका भित्रिएको पुष्टि भएको छ। उनले प्रयोग गरेको आक्रमण हतियार कहाँबाट प्राप्त भयो भन्ने विषयमा अनुसन्धान भइरहेको जनाइएको छ।
टेनेसी राज्यमा २०२४ मा पारित कानुनअनुसार, अब सुरक्षा निकायले ICE (आप्रवासन तथा भन्सार प्रवर्तन) द्वारा जारी गरिएको डिटेनर अनुरोध अनिवार्य रूपमा पालना गर्नुपर्छ। यसका आधारमा, न्यासभिलमा फेब्रुअरीमा मात्र ३३ जना विरुद्ध अनुरोध गरिएर ११ जनालाई नियन्त्रणमा लिइएको थियो भने मार्चमा ७५ अनुरोधबाट ४२ जना पक्राउ परेका थिए।
घटनाले आप्रवासन र सार्वजनिक सुरक्षासम्बन्धी बहसमा फेरि एउटा संवेदनशील अध्याय थपेको छ। संघीय तथा राज्य स्तरमा आप्रवासन कानुनलाई थप कडा बनाउने दबाब बढ्दै गएको छ।
