बाइडेनका पूर्व सल्लाहकारले सीमासम्बन्धी संकट स्वीकार नगर्नु नै ट्रम्पको पुनः जितको कारण भएको स्वीकार
न्युयोर्क- अमेरिकी राष्ट्रपति जो बाइडेनका पूर्व सीमासम्बन्धी सल्लाहकार ब्लास न्युनेज-नेटोले न्यूयोर्क टाइम्समा लेख प्रकाशित गर्दै, सीमामा भइरहेको संकटलाई समयमै नस्वीकार्नु र सम्बोधन नगर्नु नै डेमोक्र्याटहरूको जनसमर्थन गुमाउनुका साथै डोनाल्ड ट्रम्पको पुनः विजयको एक प्रमुख कारण भएको बताएका छन्।
“पहिलो कदम भनेको संकट भएको स्वीकार गर्नु हो,” उनले लेखे। उनका अनुसार, बाइडेनको कार्यकालका पहिलो तीन वर्षमा अमेरिकाको दक्षिणी सीमामा गैरकानुनी प्रवेशको संख्यामा तीव्र वृद्धि हुनु आफैमा संकट थियो, जसलाई ढिलासुस्तीले झनै गम्भीर बनायो।
न्युनेज-नेटोका अनुसार कोभिड महामारीपछिको आर्थिक संकट, स्रोतको अभाव, भेनेजुएलाजस्ता मुलुकहरूमा निर्वासन गर्न नसक्नु, र निर्णय प्रक्रियामा भएको ढिलाइ यस संकटका कारण थिए। उनले सन् २०२3/२४ मा डेमोक्र्याट र रिपब्लिकनबीच द्विदलीय आप्रवासन सुधारको प्रयास चुनावी राजनीतिमा अल्झिएको उल्लेख गरेका छन्।
हाल सीमामा कडाइ भएको स्वीकार गर्दै उनले चेतावनी दिएका छन् कि यस्तो नियन्त्रणले संविधानिक प्रक्रिया क्षीण बनाएको छ। समाधानको लागि उनले कानुनमा सुधार गर्दै कानुनी आप्रवासीलाई स्वागत गर्ने तर अवैध प्रवेशकर्तासँग कडाइ गर्ने प्रणाली आवश्यक रहेको औँल्याए।
तर, यो अभिव्यक्तिपछि उनलाई सामाजिक सञ्जालमा आलोचना सामना गर्नुपरेको छ। होमल्याण्ड सेक्युरिटी विभागले नै व्यङ्ग्य गर्दै लेख्यो, “म हुन्प्टी डम्प्टी थिएँ, अब पर्खालमा कसरी बस्ने भनेर सिकाउँदैछु।”
बाइडेन कार्यकालमा सीमामा गैरकानुनी प्रवेशको संख्यामा रेकर्ड वृद्धि भएको छ। सन् २०२३ को डिसेम्बरमा मात्र २,४९,७८५ जनालाई सीमामा पक्राउ गरिएको थियो। ट्रम्प प्रशासनको सुरुआती महिनाहरूमा त्यस्तो संख्या ९०% ले घटेको थियो।
