पश्चिम एसिया जाने कामदारलाई श्रम स्वीकृति खुला, दिल्लीबाट अनुमति लिन नपर्ने
काठमाडौं- सरकारले पश्चिम एसियामा रोजगारीका लागि जाने नेपाली कामदारको श्रम स्वीकृति र वैधानिकीकरण प्रक्रिया फेरि खुला गरेको छ। परराष्ट्र मन्त्रालयका महाशाखा प्रमुख रामकाजी खड्काले यसबारे जानकारी दिए। उनका अनुसार श्रम मन्त्रालयले बन्द गरेको यो सेवा अब पूर्ण रूपमा सञ्चालनमा आएको छ।
परराष्ट्र मन्त्रालयले पश्चिम एसियामा रहेका सबै नेपाली दूतावासलाई कामदारको मागपत्र प्रमाणीकरण सुरु गर्न निर्देशन दिएको छ। त्यस्तै, ती देशका नेपाली नियोगमा बनेको ‘उद्धार टोली’ (र्यापिड रेस्पोन्स टिम) लाई अब स्थायी बनाइने खड्काले बताए।
अब नेपालबाटै श्रम स्वीकृति लिएर जान सकिने भएकाले पुनः प्रवेश भिसाका लागि नयाँ दिल्लीस्थित दूतावासबाट अनुमति पत्र (एनओसी) लिइरहनु पर्दैन। विदेशमा रहेका नेपालीको विवरण दर्ता गर्ने अनलाइन प्रणालीलाई पनि सरकारले स्थायी बनाएको छ।
आपतकालीन अवस्थामा गुनासो सुन्न मन्त्रालयको नियन्त्रण कक्ष दिनरात खुला रहने व्यवस्था मिलाइएको छ। साथै, नेपाल एयरलाइन्स र हिमालय एयरलाइन्सका उद्धार उडानलाई निरन्तरता दिन पर्यटन मन्त्रालयलाई आग्रह गरिएको उनले जानकारी दिए।
