विदेश पठाउने भन्दै ठगी गर्ने ६९ परामर्श केन्द्रका सञ्चालक पक्राउ
काठमाडौं- उच्च शिक्षाका लागि विदेश पठाइदिने बहानामा विद्यार्थी ठग्ने ६९ जना शैक्षिक परामर्श केन्द्रका सञ्चालकलाई प्रहरीले पक्राउ गरेको छ। ठगीको गुनासो आएपछि काठमाडौंको उपत्यका अपराध अनुसन्धान कार्यालयको टोलीले विभिन्न ठाउँमा छापा मारेर उनीहरूलाई समातेको हो।
ती केन्द्रहरूले सरकारी नियम र मापदण्ड पालना नगरेको पाइएको छ। दर्ता र नवीकरण नै नगरी उनीहरूले अवैध रूपमा परामर्श सेवा र भाषा कक्षा चलाइरहेका थिए। प्रहरीले नियम मिचेर चलाइएका यस्ता ९५ वटा केन्द्रमा कारबाही अघि बढाएको थियो, जसमध्ये ६९ जना सञ्चालकलाई नियन्त्रणमा लिएर अनुसन्धान थालेको छ।
यस घटनामा ठगीमा परेका अरू मानिसलाई पनि आफ्नो कार्यालयमा सम्पर्क गर्न प्रहरीले आग्रह गरेको छ।
