इरानसँगको शान्ति वार्तामा प्रगति भएको अमेरिकी उपराष्ट्रपतिको दाबी
न्युयोर्क- अमेरिकी उपराष्ट्रपति जेडी भान्सले इरानसँगको शान्ति सम्झौताका लागि भइरहेको वार्तामा उल्लेखनीय प्रगति भएको बताएका छन्। सञ्चारकर्मीहरूसँग बोल्दै उनले दुवै पक्ष सैन्य कारबाहीलाई निरन्तरता दिन इच्छुक नरहेको उल्लेख गरे।
भान्सका अनुसार राष्ट्रपति डोनाल्ड ट्रम्पको निर्देशन बमोजिम अमेरिकाले इमानदारीपूर्वक वार्ता प्रक्रियालाई अगाडि बढाइरहेको छ। उनले वार्ता सफल नभएमा विकल्प ‘बी’ समेत तयार रहेको चेतावनी दिए। वार्ताको मुख्य एजेण्डाबारे प्रष्ट पार्दै भान्सले इरानले कुनै पनि हालतमा आणविक हतियार प्राप्त गर्न नपाउने अमेरिकी अडान दोहोर्याए।
रुसले इरानको संवर्धित युरेनियम आफ्नो नियन्त्रणमा लिने भनी सार्वजनिक भएका केही प्रतिवेदनहरूलाई भान्सले अस्वीकार गरेका छन्। उनले यस्तो विषय अमेरिकी सरकारको हालको योजनामा नरहेको र इरानी पक्षले पनि यसमा चासो नदेखाएको प्रष्ट पारे।
यसअघि राष्ट्रपति डोनाल्ड ट्रम्पले पाकिस्तानको मध्यस्थतामा भइरहेको वार्तामा प्रगति भएको जानकारी खाडी क्षेत्रका सहयोगी मुलुकहरूबाट प्राप्त भएको बताएका थिए। वार्तालाई निष्कर्षमा पुर्याउनका लागि ट्रम्पले थप दुई देखि तीन दिनको समय दिएका छन्। यसैबीच, राष्ट्रपति ट्रम्पले इरानविरुद्धको सैन्य आक्रमणको योजनालाई स्थगित गर्न पेन्टागनलाई निर्देशन दिइसकेका छन्।
