प्रधानमन्त्रीको अभिव्यक्ति ‘राष्ट्रघाती’ : अध्यक्ष ओली
काठमाडौं- नेकपा एमालेका अध्यक्ष केपी शर्मा ओलीले संसदमा प्रधानमन्त्रीले दिएको अभिव्यक्तिलाई ‘राष्ट्रघाती’ र ‘देशद्रोही’ भनेका छन्। नेपालले भारतको सीमा मिचेको भनी प्रधानमन्त्रीले दिएको बयान पूर्णतः झुटो र देशको अहितमा रहेको उनले बताए। नेपालले भारतको एक इन्च जमिन पनि नमिचेको स्पष्ट पार्दै ओलीले द्विपक्षीय सीमा समस्या समाधानमा तेस्रो मुलुकलाई सामेल गराउने प्रस्ताव अकुटनीतिक र अदूरदर्शी भएको जिकिर गरे।
प्रधानमन्त्रीका गलत भनाइ नरोक्ने तर राष्ट्रियताको पक्षमा बोल्ने सांसदलाई कारबाही गर्न खोजेको भन्दै उनले सभामुखको भूमिकाप्रति असन्तुष्टि जनाए। आफ्ना सांसदहरू देश, लोकतन्त्र र सुशासनको पक्षमा उभिएको भन्दै ओलीले उनीहरूको बचाउ गरे। जस्तोसुकै कारबाही वा गिरफ्तारीबाट पनि आफू नडराउने र देशको सीमा रक्षाका लागि एमालेले निरन्तर संघर्ष गर्ने उनले प्रस्ट पारे।
