फिफा अध्यक्ष इन्फान्टिनोलाई झट्का: इंग्लिस एफएले पनि समर्थन फिर्ता लिने
न्युयोर्क- विश्वकप लगायतका प्रतियोगितामा निजी लगानीकर्ता भित्र्याउने विवादित योजना ल्याएपछि फिफा अध्यक्ष जियानी इन्फान्टिनोलाई ठूलो झट्का लागेको छ। वेल्सपछि अब इंग्लिस फुटबल एसोसिएसन (एफए) ले पनि उनलाई दिएको समर्थन फिर्ता लिने तयारी गरेको छ।
आगामी मार्चमा हुने फिफा अध्यक्षको चुनावमा ५६ वर्षीय इन्फान्टिनो चौथो तथा अन्तिम कार्यकालका लागि उठ्दै छन्। तर, युरोपेली फुटबल महासंघ (युइएफए) र उत्तर अमेरिकी फुटबल संघ (कन्काकाफ) ले उनको कडा विरोध गर्दै नेतृत्वमाथि प्रश्न उठाएका छन्। युइएफएले त फिफाविरुद्ध कानुनी कारबाही गर्ने चेतावनी समेत दिएको छ।
इन्फान्टिनोले ‘फिफा फरवार्ड इन्टरप्राइज’ नामको नयाँ कम्पनी बनाएर अमेरिकी लगानीकर्तालाई सेयर बेच्ने योजना ल्याएका थिए। यो योजनालाई समर्थन गरेबापत हरेक सदस्य राष्ट्रलाई ४ करोड डलर दिने प्रलोभन समेत देखाइएको थियो। चौतर्फी विरोधपछि यो योजना रद्द भए पनि इन्फान्टिनोमाथिको संकट भने टरेको छैन।
युइएफएले यो योजनासँग सम्बन्धित सबै कागजपत्र, इमेल, म्यासेज र बैठकका नोटहरू नहटाउन र सुरक्षित राख्न फिफालाई कडा निर्देशन दिएको छ। वेल्ससँगै सर्बिया र फिनल्यान्डले पनि इन्फान्टिनोलाई दिएको समर्थन फिर्ता लिइसकेका छन्। स्कटल्यान्डको एफए पनि युइएफएकै पक्षमा उभिएको छ।
यद्यपि, एसिया र अफ्रिकाका केही देशहरूले भने उनलाई समर्थन गरिरहेका छन्। कतार, लेबनान, कुवेत र श्रीलंकाले इन्फान्टिनोको पक्षमा उभिने बताएका छन्। युरोपको तीव्र विरोधका बावजुद इन्फान्टिनोलाई पदबाट हटाउन फिफा काउन्सिलको आपतकालीन बैठक बोलाउनुपर्ने हुन्छ, जसका लागि ३७ मध्ये १९ सदस्यको समर्थन आवश्यक पर्छ। हाल युरोप र अन्य केही देशका प्रतिनिधिहरूले त्यसका लागि आवश्यक संख्या पुर्याउने प्रयास गरिरहेका छन्।
