बाढीपीडितको आक्रोशलाई राज्यप्रतिको अपेक्षा बुझौँ : रवि लामिछाने
काठमाडौं- राष्ट्रिय स्वतन्त्र पार्टीका सभापति रवि लामिछानेले बाढीबाट प्रभावित नागरिकको आक्रोशलाई सरकारविरुद्धको प्रहार नभई राज्यप्रतिको अपेक्षाका रूपमा बुझ्नुपर्ने बताएका छन्।
प्रतिनिधिसभा बैठकमा बोल्दै उनले विपत्तिमा परेका नागरिकलाई सामाजिक सञ्जालमा जथाभावी टिप्पणी र गालीगलौज नगर्न आग्रह गरे। भदौ १० गते रसुवाको भोटेकोसीमा आएको विनाशकारी बाढी प्राकृतिक विपत्ति मात्र नभई जलवायु परिवर्तनको गम्भीर असर भएको उनले बताए।
लामिछानेले विपत्तिको समयमा उद्धार र राहतमा खटिएका सुरक्षाकर्मी, स्थानीय प्रशासन र सरकारलाई धन्यवाद दिए। यस्तो बेला सरकारको आलोचना मात्र गरेर समय खेर फाल्न नहुने र राष्ट्रिय पीडालाई राजनीतिक हतियार बनाउन नहुनेमा उनले जोड दिए।
जलवायु परिवर्तनमा नेपालको भूमिका कम भए पनि धेरै क्षति भोग्नुपरेको भन्दै उनले विश्वसामु न्याय माग्नुपर्ने बताए। अब हुने संयुक्त राष्ट्रसंघको महासभामा नेपालले याचना गर्नेभन्दा पनि तथ्य र प्रमाणसहित जलवायु न्यायको कुरा उठाउनुपर्ने उनको भनाइ छ। बाढीबाट भएको क्षतिको व्यवस्थित अभिलेख राखेर अन्तर्राष्ट्रिय दाबी गर्नुपर्ने र पुनर्निर्माणका नाममा ऋण नभई अनुदान ल्याउन पहल गर्नुपर्ने उनले बताए।
आजको बैठकमा प्रधानमन्त्री बालेन्द्र शाह र नेकपाका संयोजक पुष्पकमल दाहाललगायतका नेताहरू पनि उपस्थित थिए।
