एआईको जोखिमबाट बच्न पूर्वतयारी गर्न अस्ट्रेलियाको जोड
सिड्नी- अस्ट्रेलियाको साइबर गुप्तचर निकायकी प्रमुख अबिगेल ब्राडशाले आर्टिफिसियल इन्टेलिजेन्स (एआई) बाट हुन सक्ने जोखिम पहिचान गर्न पूर्वचेतावनी प्रणाली बनाउनुपर्ने बताइन्। सोमबार क्यानबेरामा आयोजित सम्मेलनमा उनले एआई आक्रमणले सरकारी र व्यावसायिक क्षेत्रका पुराना प्रविधिमा रहेका कमजोरीलाई तारो बनाउन सक्ने चेतावनी दिइन्।
उनले एआईलाई सुरक्षा बढाउन प्रयोग गर्न सकिने भन्दै सम्भावित जोखिम सुरुमै चिन्न सबैले सहकार्य गर्नुपर्नेमा जोड दिइन्। गुप्तचर निकाय र एआई बनाउने कम्पनीबीच छिटो सूचना आदानप्रदान गरेमा सुरक्षा चुनौती समयमै बुझ्न सकिने उनले बताइन्।
केही दिनअघि मात्र एन्थ्रोपिक कम्पनीका प्रमुख डारियो अमोडेईले एआई विकासको गति अलि कम गर्न र यसको सुरक्षा परीक्षण गर्न आग्रह गरेका थिए। उनको कुरालाई ओपनएआईका प्रमुख साम अल्टम्यान र एक्सएआईका एलन मस्कले पनि समर्थन गरेका छन्। ब्राडशाको भनाइ पनि यसै सन्दर्भमा आएको हो।
यसैबीच, अस्ट्रेलियाका विज्ञान तथा प्रविधि सहायक मन्त्री एन्ड्र्यु चार्लटनले एआईको सुरक्षा मापदण्ड तोक्ने जिम्मा कुनै एउटा कम्पनी वा देशलाई मात्र दिन नहुने बताए। उनले एआईको सुरक्षित विकासका लागि सरकार, प्रविधि क्षेत्र र अन्तर्राष्ट्रिय समुदायबीच समन्वय हुनुपर्नेमा जोड दिए।
