एनपिएलको तयारी अन्तिम चरणमा, त्रिवि मैदान चिटिक्क पारिँदै
नेपाल प्रिमियर लिग (एनपिएल) को तेस्रो संस्करण नजिकिँदै गर्दा कीर्तिपुरस्थित त्रिवि क्रिकेट मैदानको मर्मत र व्यवस्थापनको काम अन्तिम चरणमा पुगेको छ। आगामी कात्तिक ९ देखि मङ्सिर ५ गतेसम्म हुने प्रतियोगिताका लागि मैदान तयार गर्ने काम धमाधम भइरहेको छ।
नेपाल क्रिकेट सङ्घ (क्यान) का सचिव पारस खड्काले दसैँसम्म सबै काम सक्ने योजना रहेको बताए। विगतमा दर्शकले भोगेका शौचालय र धुलोको समस्या यसपटक दोहोरिन नदिन विशेष ध्यान दिइएको उनले जानकारी दिए। दर्शक क्षमता बढाउनुका साथै मैदान प्रवेश गर्ने बाटो र गेट सुधार गर्न क्यानले काम गरिरहेको छ।
प्रतियोगिता दसैँ र तिहारको बीचमा भए पनि क्रिकेट समर्थकको उत्साहमा कमी नआउने क्यानको विश्वास छ। विदेशी खेलाडीको उपलब्धता र अन्य लिगको समयलाई हेरेर यो मिति तय गरिएको पारसले बताए। यसपटक टोलीहरुले चर्चित विदेशी खेलाडी ल्याइरहेकाले टिभीमा देखेका खेलाडीलाई प्रत्यक्ष हेर्न दर्शक मैदान ओइरिने उनले विश्वास व्यक्त गरे।
