पुरानो प्रविधिले धोका दिँदा अमेरिकाभर हवाई उडान ठप्प, हजारौँ यात्रु अलपत्र
न्युयोर्क- अमेरिकामा दशकौँ पुरानो सञ्चार प्रविधि बिग्रिँदा शुक्रबार केही घण्टाका लागि देशभरका हवाई उडान रोकिए। उडान ठप्प हुँदा लाखौँ यात्रु प्रभावित भए भने करिब छ हजार उडान रद्द गरिए।
यातायात मन्त्री सन डफीले सन् १९८० को दशकका पुराना तार र उपकरणमा धेरै भार परेकाले सञ्चार सेवा अवरुद्ध भएको बताए। उनले हवाई उडान प्रणालीलाई नयाँ बनाउन संसद्सँग ३० अर्ब डलरभन्दा बढी बजेट मागेका छन्। सरकारले यो कुनै नियोजित आक्रमण नभएको स्पष्ट पारेको छ।
समस्या आएपछि उड्न ठिक्क परेका जहाजबाट समेत यात्रुलाई अन्तिम समयमा ओरालिएको थियो। करिब चार घण्टापछि मात्र उडान फेरि सुचारु भयो। उडान रद्द हुँदा यात्रुहरू वैकल्पिक गाडी खोज्न लामो लाइन बस्न र विमानस्थलमै रात बिताउन बाध्य भए।
