मध्य अमेरिकामा भीषण गर्मीः आठ करोड मानिस प्रभावित
न्युयोर्क- अमेरिकाको मध्य भागमा अत्यधिक गर्मी बढेपछि करिब आठ करोड मानिस प्रभावित भएका छन्। डल्लासदेखि नर्थ डाकोटासम्मको ठूलो क्षेत्रमा तातो हावा चलेकाले मौसमविद्हरूले सतर्क रहन चेतावनी जारी गरेका छन्।
वायुमण्डलमा तातो हावा थुप्रिने प्रक्रियाका कारण लगातार तापक्रम बढिरहेको छ। रातको समयमा पनि तापक्रम नघट्दा मानिसहरूले गर्मीबाट राहत पाउन सकेका छैनन्। नेब्रास्का र लास भेगास जस्ता शहरहरूमा तापक्रम ४२ देखि ४५ डिग्री सेल्सियससम्म पुगेको छ।
अत्यधिक गर्मीका कारण बाहिर काम गर्ने मजदुर, बालबालिका, वृद्धवृद्धा र बिरामीहरू बढी जोखिममा परेका छन्। मौसमविद्हरूका अनुसार यो गर्मी आगामी सातासम्म जारी रहनेछ। जलवायु परिवर्तनका कारण यस्ता अत्यधिक गर्मी हुने समस्या बारम्बार दोहोरिन थालेको विज्ञहरूले बताएका छन्।
