क्यालिफोर्नियामा पक्राउ परेका मजदुर नेतामाथिको मुद्दा सरकारले फिर्ता लिँदै
न्युयोर्क- अमेरिकाको क्यालिफोर्नियामा ट्रम्प प्रशासनको कडा अध्यागमन नीतिको विरोध गर्दा पक्राउ परेका एक मजदुर नेतामाथिको फौजदारी मुद्दा खारेज हुने भएको छ।
लस एन्जलसस्थित अमेरिकी सरकारी वकिलको कार्यालयले ‘सर्भिस इम्प्लोइज इन्टरनेसनल युनियन क्यालिफोर्निया’का अध्यक्ष डेभिड हुएर्टा विरुद्धको मुद्दा फिर्ता लिन सोमबार अदालतमा निवेदन दिएको छ। यदि उनले जमानतका सर्तहरू पालना गरिरहे भने आगामी महिनाको अन्त्यसम्ममा यो मुद्दा पूर्ण रूपमा खारेज हुने सरकारी वकिलहरूले बताएका छन्।
डेभिडलाई गत वर्षको जुन महिनामा लस एन्जलसको एउटा व्यापारिक भवन बाहिर आन्दोलन गर्ने क्रममा पक्राउ गरिएको थियो। त्यतिबेला संघीय अधिकारीहरूले आप्रवासी नियम उल्लंघनको आशंकामा त्यहाँ छापा मारिरहेका थिए। अधिकारीहरूले डेभिडले बाटो छेकेर प्रहरीलाई भित्र पस्न नदिएको र काममा अवरोध गरेको आरोप लगाएका थिए।
तर डेभिडले भने शान्तिपूर्ण रूपमा विरोध गर्न पाउने आफ्नो संवैधानिक अधिकार प्रयोग गर्दा प्रहरीले लडाएको, खुर्सानीको धुलो (पेपर स्प्रे) छर्किएको र पक्राउ गरेको बताए। उनले यो मुद्दा आफूलाई तर्साउन र चुप लगाउनका लागि मात्रै लगाइएको दाबी गरे। “म आप्रवासी परिवार र सबै मजदुरको सम्मानका लागि लडिरहनेछु,” उनले भने।
सुरुमा उनीमाथि गम्भीर प्रकारको अपराधको मुद्दा लगाइएको थियो, जसलाई पछि घटाइएको थियो। अहिले भने न्याय मन्त्रालयले यो मुद्दालाई पूर्ण रूपमा खारेज गर्न लागेको हो।
डेभिडको युनियनमा सफाइ मजदुर, सुरक्षा गार्ड लगायत करिब साढे सात लाख सदस्य आबद्ध छन्। उनको गिरफ्तारीपछि देशभरका युनियन नेता र आप्रवासी अधिकारकर्मीहरूले विरोध प्रदर्शन गर्दै उनको रिहाइको माग गरेका थिए। ट्रम्प प्रशासनको अध्यागमन नीतिको विरोध गर्नेहरूलाई दबाउन खोज्ने सरकारी प्रयास अदालतमा आएर असफल भएको यो पछिल्लो उदाहरण हो।
