हङकङका लोकतन्त्र पक्षधर नेतालाई बेलायतमा ६ महिना बस्न अनुमति
न्युयोर्क- हङकङका लोकतन्त्र पक्षधर नेता तथा अभियन्ता वु ची-वाइलाई बेलायतमा ६ महिना बस्न अनुमति मिलेको छ। पाँच वर्षभन्दा बढी समय हङकङको जेलमा बिताएपछि उनी आफ्नो परिवार भेट्न बेलायत पुगेका थिए।
सुरुमा बेलायतका अध्यागमन अधिकारीहरूले उनलाई जम्मा सात दिनका लागि मात्र बस्न दिएका थिए। उनले बेलायतमै स्थायी बसोबास गर्न खोजेको हुन सक्ने अधिकारीहरूको शंका थियो। यसले गर्दा उनलाई छिट्टै फर्काइने डर थियो। तर अधिकारकर्मी र हङकङका नागरिकहरूले चिन्ता व्यक्त गरेपछि बेलायत सरकारले निर्णय फेरेको हो। मङ्गलबार उनका वकिलले वुलाई पर्यटकको रूपमा ६ महिना बस्न दिइएको पत्र प्राप्त भएको पुष्टि गरे।
सन् २०२१ मा चीनले हङकङमा कडा सुरक्षा कानुन लागू गरेपछि पक्राउ परेका ४७ जना अभियन्तामध्ये वु पनि एक हुन्। उनी हङकङको सबैभन्दा ठूलो लोकतन्त्रवादी दलका पूर्व अध्यक्ष समेत हुन्। जेल सजाय काटेर छुटेपछि उनी वर्षौंपछि आफ्नो परिवारसँग पुनर्मिलन गर्न बेलायत पुगेका हुन्।
