३ मंसिर २०८३, बिहिबार
19 November 2026, Thursday

टेन्ट टाँगेर आफ्नै थातथलो फर्किए टिमुरेका बाढीपीडित

टेन्ट टाँगेर आफ्नै थातथलो फर्किए टिमुरेका बाढीपीडित

रसुवाको टिमुरेका बाढीपीडित आफ्नै थातथलो फर्किएर अस्थायी टेन्टमा बस्न थालेका छन्। गत भदौ १० गते ल्हेन्दे खोलामा आएको बाढीबाट विस्थापित ६८ घरधुरीमध्ये ४८ जना मङ्सिर १ गतेदेखि टिमुरेको खैँदीमा टेन्ट टाँगेर बसेका हुन्।

बाढीपछि केही पीडित कोठा भाडामा लिएर बसेका छन् भने काठमाडौँमा बस्न नसकेकाहरू गाउँ फर्किएका छन्। स्थानीय कामीनुर्पु तामाङले आफ्नो जन्मभूमि, परम्परा र रीतिरिवाज जोगाउन गाउँ फर्किएको बताए। करिब ९० प्रतिशत पीडित काठमाडौँमा बस्न सक्ने अवस्थामा नरहेको उल्लेख गर्दै उनले खेतीकिसानी र पशुपालन गरेर जीवनयापन गर्ने सोचले गाउँ फर्किएको जानकारी दिए।

सरकारले अस्थायी बसोबासको टुङ्गो नलगाउँदा पीडित अन्योलमा परेको उनको भनाइ छ। विभिन्न सङ्घसंस्थाले थप टेन्ट र राहत सामग्री उपलब्ध गराउने आश्वासन दिएको तामाङले बताए।

अर्का स्थानीय पेमा दोर्जे घलेका अनुसार यसअघि मुस्ताङ गुम्बामा २०७ पुरुष र २०४ महिला गरी ४११ जना बाढीपीडित आश्रित थिए। तीमध्ये १५१ बालबालिका र ८० वृद्धवृद्धा थिए। सरकारले अस्थायी बसोबास कहाँ र कसरी व्यवस्थापन गर्ने भन्ने ठोस निर्णय नगर्दा पीडित अन्योलमा परेको उनले बताए।